बीमा के हो ? हेर्नुहोस् बीमासँग सम्बन्धित शब्द र अर्थ
बीमा खबर । बीमा भनेको कसैको ज्यान वा सम्पत्तिको नोक्सानी हुँदा दिने आर्थिक सुरक्षा र जिम्मेवारी हो । बीमा जोखिम हस्तान्तरण गर्ने एउटा प्रक्रिया हो । यसमा बीमा गर्नेले बीमाको शर्त अनुसार आफ्नो नियन्त्रणभन्दा बाहिरको अवस्थाले ज्यान वा सम्पत्तिमा नोक्सानी हुँदा निश्चित रकम प्राप्त गर्छ ।
पानी पर्दा हामी नभिज्नका लागि छाता प्रयोग गछौँ । छाताले हाम्रो शरीर र सम्पत्तिलाई ठूलो पानी परे पनि बचाउँछ । जसरी छाता बोकेर हिँड्दा कुनै पनि बेला पर्न सक्ने पानी र घामबाट पनि जोगिन सकिन्छ, त्यसै गरी बीमा गर्दा हाम्रो जीवन, सम्पत्ति र अन्य बहुमूल्य वस्तुको सुरक्षा हुन्छ । त्यसैले बीमाले हामीलाई आकस्मिक अवस्थामा आइपर्ने आर्थिक भारबाट बचाउँछ ।
बीमासँग सम्बन्धित शब्द तथा तीनको अर्थ
- बीमालेख : बीमालेख भन्नाले बीमा कम्पनीले जारी गर्ने बीमाका शर्तहरू उल्लेख गरिएको कागजात हो ।
- बीमक : बीमा गर्ने कम्पनी ।
- बीमित : बीमा गरिएको व्यक्ति, पशुपंक्षी वा धन ।
- बीमाशुल्क प्रिमियम : बीमा कम्पनीले वीमितको जोखिम ग्रहण गरे वापत बीमितसँग जोखिम अनुसार लिने शुल्क ।
- बीमा अवधि : बीमालेखमा उल्लेख भए अनुसार बीमाको जोखिम स्वीकार गरिने अवधि ।
- मृत्यु प्रमाणपत्र : सम्बन्धित अस्पताल, चिकित्सक वा प्राविधिकले बीमितको मृत्यु भएको भनी प्रमाणित गरिदिएको प्रमाणपत्र ।
- बीमा सर्वेयर : बीमा गरिएको सम्पत्तिको क्षति भएमा क्षति मूल्याङ्कन गर्ने व्यक्ति ।
- इच्छ्याएको व्यक्ति : बीमितले बीमा अवधिमा नै आफ्नो मृत्यु भएमा बीमाको रकम भुक्तानी दिनू भनी बीमालेखमा तोकिदिएको व्यक्ति ।
- लघु बीमा : न्यून आय, आर्थिक, सामाजिक तथा भौगोलिक कारणबाट जोखिमयुक्त वर्गका व्यक्ति तथा समुदायलाई लक्षित जीवन तथा सम्पत्तिको सुरक्षा गर्न गरिने बीमा ।
All financial information at your fingertips.
शेयर गर्नुहोस
सम्बन्धित समाचार
