कात्तिक २१ देखि एफपीओ निष्कासन गर्दै उन्नति सहकार्य लघुवित्त
बैंक खबर। उन्नति सहकार्य लघुवित्त वित्तीय संस्थाले कात्तिक २१ गतेदेखि धितोपत्रको थप सार्वजनिक निष्कासन (एफपीओ) निष्काशन गर्ने भएको छ । लघुवित्तले बैंक तथा वित्तीय संस्थासम्बन्धी ऐन २०७३ को दफा ९ बमोजिम संस्थापक र साधारण सेयर संरचना कायम गर्न एफपीओ जारी गर्न लागेको हो।
साविकको उन्नति लघुवित्त र सहकार्य लघुवित्त गाभिएपछि बनेको उन्नति सहकार्य लघुवित्तको पुँजी संरचना संस्थापक समूहको ७५.४५ प्रतिशत र सर्वसाधारणको २४.५५ प्रतिशत छ। सोही पुँजी संरचना बैंक तथा वित्तीय संस्था सम्बन्धी ऐन अनुसार ७०/३० को अनुपात कायम गर्न कम्पनीले एफपीओ जारी गर्न लागेको लघुवित्तले जनाएको छ ।
लघुवित्तले प्रतिकित्ता एक सय रुपैयाँ अंकित मूल्यमा १ करोड ७८ लाख ४५ हजार एक सय १८ रुपैयाँ बराबरको एक लाख ७८ हजार चार सय ५१.१८ कित्ता सेयर निष्कासन गर्न लागेको हो ।
एफपीओमा लगानीकर्ताले कात्तिक २१ देखि २४ गतेसम्म आवेदन दिन सक्नेछन् । सो समयमा माग भएजति आवेदन नपरे आवेदन दिने अवधि मंसिर पाँचसम्म थप हुने लघुवित्तले जनाएको छ । लगानीकर्ताले एफपीओमा न्यूनतम १० कित्तादेखि अधिकतम एक हजार कित्तासम्मका लागि आवेदन दिन सक्नेछन् ।
आवेदन नेपाल धितोपत्र बोर्डबाट स्वीकृती प्राप्त गरेका सम्पूर्ण सिआस्बा सदस्य बैंक तथा वित्तीय संस्था र सीडीएस एण्ड क्लियरिङ लिमिटेडको सफ्टवेयर ‘मेरो सेयर’ मार्फत दिन सकिने लघुवित्तले जनाएको छ ।
लघुवित्तले एफपीओ निष्कासनका लागि गराएको रेटिङमा क्रेडिट रेटिङ कम्पनी इक्रा नेपालले ‘इक्रा एनपी इस्यूअर रेटिङ बी प्लस’ प्रदान गरेको छ । लघुवित्तको एफपीओ निष्कासनको लागि धितोपत्र निष्कासन तथा बिक्री प्रबन्धकमा सिद्धार्थ क्यापिटल रहेको छ ।
अहिले लघुवित्तको चुक्ता पुँजी २२ करोड ९० लाख २० हजार छ सय १८ रुपैयाँ २९ पैसा छ। एफपीओ निष्कासनपश्चात लघुवित्तको चुक्ता पुँजी २४ करोड ६८ लाख ६५ हजार सात सय ३६ रुपैयाँ ३२ पैसा पुग्नेछ ।
All firancial information at your fingertips.
शेयर गर्नुहोस
सम्बन्धित समाचार
