नेपाल बैंकर्स संघमा दिगो वित्त विभागको स्थापना
बैंकको खबर । नेपाल बैंकर्स संघ (एनबिए) र इन्भेष्ट फर इम्प्याक्ट नेपाल (आईआईएन) द्वारा सयुक्त रूपमा ‘नेपालको बैंकिङ उद्योगमा जलवायु वित्त र हरित वित्त वर्गीकरणलाई एकीकृत गर्ने सम्बन्धी सेमिनार’ आयोजना भएको छ । नेपालको वित्तीय क्षेत्रलाई दिगो वित्तपोषण उन्मुख बनाउन, यसको वर्तमान अवस्थाको मुल्यांकन तथा यससँग सम्बन्धित अन्तर्राष्ट्रिय अभ्यास तथा चुनौतीहरुलाई कसरी समाधान गर्दै अगाडी बढ्न सकिन्छ भन्ने विषयमा कार्यक्रम केन्द्रित थियो।
कार्यक्रममा नेपालका लागि स्विट्जरल्याण्डका राजदूत डा. डेनियल मेउलीले दिगो बैंकिङको लागि सुरुवात गरेको पहल महत्वपूर्ण रहेको बताए । नेपाल बैंकर्स संघका अध्यक्ष सुनिल केसीले नेपालको बैंकिङ उद्योगमा जलवायु वित्तको महत्वमा जोड दिँदै दिगो वित्त प्रवद्र्धन गर्न नेपालको बैंकिङ क्षेत्र प्रतिबद्ध रहेको बताए । एफएमओ नेदरल्याण्ड्सका प्रमुख कार्यकारी अधिकृत मिखेल योङ्गनिलले बैंकिङ क्षेत्रले जलवायु परिवर्तनको असरलाई कम गर्न अन्तर्राष्ट्रिय स्तरमा निभाइरहेको भूमिका र यसले सृजना गरेको चुनौतीलाई कम गर्दै अवसरबाट कसरी फाइदा लिन सकिन्छ भन्ने बारेमा आफ्नो दृष्टिकोण राखे ।
नेपाल राष्ट्र बैंकका गभर्नर महाप्रसाद अधिकारीले राष्ट्र बैंकले दिगो बैंकिङलाई प्रवद्र्धन गर्न गरेको नीतिगत व्यवस्था र नेपालको वित्तीय क्षेत्रलाई अन्तरौष्ट्रिय मापदण्डसँग जोड्न महत्वपूर्ण भूमिका खेलेको बताए ।
नेपालको बैंकिङ क्षेत्रले दिगो विकासमा सामना गरिरहेको चुनौतीहरूलाई समाधान गर्दै बैंकङ क्षेत्रलाई दिगो वित्त उन्मुख गराउनको साथै उनीहरूको ज्ञान, शिप र क्षमता अभिवृद्धि गर्ने उद्देश्य अनुरुप कार्यक्रमको अवसरमा संयुक्त रुपमा नेपाल बैंकर्स संघमा दिगो वित्त विभागको स्थापनाको उद्घाटन गरिएको छ ।
कार्यक्रमको प्राविधिक सत्र डीबीएस सिंगापुरका पूर्वप्रबन्ध निर्देशक तथा स्ट्यान्डर्ड चार्टर्ड बैंक यूकेका सस्टेनेबिलिटी विशेषज्ञ युलान्डा चुङले गरेका थिए । उनले अन्तर्राष्ट्रिय परिदृश्यलाई केलाउँदै जलवायु परिवर्तनले नेपाललाई पार्न सक्ने प्रभाव, यसको जोखिम र नेपालको बैंकिङ क्षेत्रमा यसको सान्दर्भिकता बुझ्न महत्वपूर्ण सिद्धान्तहरूलाई सम्बोधन गरे ।
कार्यक्रममा नेपाल राष्ट्र बैंकका कार्यकारी निर्देशक गुरुप्रसाद पौडेल, जीसुन हान (प्रबन्धक, ऊर्जा-एशिया र ईसीए एफएमओ), एन्टोनिया फ्लक (कार्यक्रम प्रबन्धक, स्विस एजेन्सी फर डेभलपमेन्ट एण्ड कोअपरेशन), काट्जा सिल्वा-लिएंडर (प्रबन्ध निर्देशक, क्याडमस यूके), र दीपककुमार डे (कार्यकारी समिति सदस्य, नेपाल बैंकर्स एशोसिएसन) लगायतका प्रमुख व्यक्तिहरूले जलवायु वित्त रणनीतिहरू लाई बैंकिङ सञ्चालनमा एकीकृत गर्ने सम्बन्धी संवाद प्रस्तुत गरे । यस सत्रले नियामक ढाँचाहरू, जोखिम व्यवस्थापन र नवीन हरित वित्तीय उत्पादनहरूको महत्त्व बारेमा गहन छलफल गरेको थियो ।
कार्यक्रममा सरकारी अधिकारीहरू, विकास साझेदार, वाणिज्य बैंकका प्रतिनिधि, सञ्चार माध्यम, र सम्बन्धित सरोकारवालाहरू लगायत २०० भन्दा बढी सहभागी रहेका थिए ।
शेयर गर्नुहोस
सम्बन्धित समाचार
