आरविवि सेक्युरिटिजले सेयर ब्रोकरको काम थाल्यो
![आरविवि सेक्युरिटिजले सेयर ब्रोकरको काम थाल्यो](http://bankkokhabar.com.np/images/news/1720697599_RBBL SECURITIES.jpg)
बैंक खबर । राष्ट्रिय वाणिज्य बैंक लिमिटेडको पूर्ण स्वामित्वमा स्थापित सहायक कम्पनी आरविवि सेक्युरिटिज कम्पनी लिमिटेडले धितोपत्र व्यवसायको व्यावसायिक कारोबार सुरु गरेको छ । कम्पनीले सेयर ब्रोकर सम्बन्धस् कारोबार २०८१ असार २६ गते बुधबारबाट सञ्चालनमा ल्याएको हो ।
धितोपत्र दलालको रुपमा ग्राहकलाई उच्चस्तरीय ब्रोकरेज सेवा प्रदान गर्ने लक्ष्य राखेर स्थापना भएको आरविवि सेक्युरिटिज कम्पनी लिमिटेडको कुल चुक्ता पुँजी २० करोड रुपैयाँ छ । सीमित कार्य गर्ने धितोपत्र दलालको रुपमा नेपाल धितोपत्र बोर्डबाट २०८० साउन ३२ गते स्वीकृति प्राप्त गरेको आरविवि सेक्युरिटिज कम्पनी लिमिटेडले २०८० माघ ३ गते मा नेपाल स्टक एक्सचेन्जबाट सदस्यता नम्बर ९७ प्राप्त गरेको थियो ।
त्यसैगरी सिडिएस एण्ड क्लियरिङ्ग लिमिटेबाट २०८० माघ २३ मा राफसाफ सदस्यता समेत प्राप्त गरिसकेको छ । ग्राहकहरुलाई गुणस्तरीय सेवा प्रदान गर्ने प्रतिबद्धताका साथ कारोबार सञ्चालनमा ल्याएको कम्पनीले धितोपत्र कारोबारसहित अन्य विशिष्टकृत सेवा प्रदान गर्ने उद्देश्य राखेको छ । कम्पनीले प्रारम्भिक चरणमा ग्राहकहरुलाई धितोपत्र कारोबार सेवा प्रदान गर्ने र भविष्यमा नियामक निकायवाट अनुमति प्राप्त गरी मार्जिन, थोक कारोबार तथा अन्य पुँजीबजारसम्बन्धी सेवाहरु प्रदान गर्नेछ ।
वित्तीय क्षेत्रमा लामो समयदेखि नेतृत्वदायी भूमिकामा रहेका व्यक्तित्वहरुको सञ्चालक समितिवाट निर्देशित आरविवि सेक्युरिटिज कम्पनी लिमिटेडले आफ्ना ग्राहकहरुलाई उत्कृष्ट सेवा प्रदान गर्दै धितोपत्र दलाल सेवाको लागि अग्रणी कम्पनी बन्ने लक्ष्य राखेको छ । दरवारमार्ग, काठमाण्डौमा रहको कार्यलयबाट कम्पनीले हाल आफ्नो सेवाहरु प्रदान गर्दै आएको छ ।
All financial information at your fingertips.