राष्ट्रिय वाणिज्य बैंकद्वारा कर्मचारीलाई उत्कृष्ठ बैंक सेवा पुरस्कार प्रदान
बैंक खबर । राष्ट्रिय वाणिज्य बैंक लिमिटेडको ५८औँ वाषिकोत्सवको अवसरमा २०७९ माघ १० गते घोषणा गरिएका आर्थिक वर्ष २०७७/७८ र २०७८/७९ मा उत्कृष्ट कार्य सम्पादन गर्ने बैंकका शाखा कार्यालय तथा कर्मचारीहरुलाई पुरस्कार सम्मान गरेको हो । बैंकले एक समारोहकाबीच बैंक सञ्चालक समितिका अध्यक्ष डा.बलराम पाठकले पुरस्कार वितरण गरेको जनाएको छ ।
कार्यक्रममा सर्वोत्कृष्ठ कार्य सम्पादन गरे वापत सर्वोत्कृष्ठ बैंक पुरस्कार आर्थिक वर्ष २०७८/७९ को मानव संशाधन विभागका विभागीय प्रमुख भीमप्रसाद घिमिरे र आर्थिक वर्ष २०७७/७८ को ब्रान्च अपरेशन विभागका विभागीय प्रमुख सरोज वस्नेतलाई जनही नगद ५० हजार रुपैयाँसहित प्रमाणपत्र प्रदान गरिएको बैंकले जनाएको छ । त्यसैगरी उत्कृष्ठ कार्य सम्पादन गरे वापत आर्थिक वर्ष २०७८/७९ मा अन्य ३३ जना र आर्थिक वर्ष २०७७/७८ मा अन्य ३३ जना कर्मचारीलाई उत्कृष्ट बैंक सेवा पुरस्कार जनही नगद २० हजार रुपैयाँसहित प्रमाणपत्र प्रदान गरिएको थियो ।
सो अवसरमा शाखा कार्यालयहरुमध्ये सर्वप्रथम हुने आर्थिक वर्ष २०७८/७९ मा शाखा कार्यालय बिराटनगर र आर्थिक वर्ष २०७७/७८ शाखा कार्यालय सुर्यविनायकलाई प्रति शाखा नगद ५० हजार रुपैयाँसहित प्रमाणपत्र प्रदान गरिएको बैंकले जनाएको छ । त्यसैगरी अन्य उत्कृष्ट कार्य सम्पादन गर्ने आर्थिक वर्ष २०७८/७९ मा १७ वटा शाखा र आर्थिक वर्ष २०७७/७८ मा अन्य १७ वटा शाखा कार्यालयका प्रबन्धकहरुलाई जनही नगद १० हजार देखि ३० हजार रुपैयाँसम्म र प्रमाणपत्र प्रदान गरिएको पनि बैंकले जनाएको छ । साथै, कार्यक्रममा कर्मचारीहरुलाई बरिष्ठ बैंकर्स अनिल केशरी शाहबाट ट्रान्सफरमेशनल लिडरशिप विषयमा प्रशिक्षण समेत प्रदान गरिएको थियो ।
सो कार्यक्रममा बैंक सञ्चालक समितिका अध्यक्ष डा. बलराम पाठकले उत्कृष्ट कर्मचारी तथा शाखा कार्यालयका प्रवन्धकहरुलाई पुरस्कार प्रदान गर्दै बैंकिङ क्षेत्रमा नयाँ नयाँ प्रविधि र सोचको विकास भैरहेको सन्दर्भमा कर्मचारीहरुले दक्षतापूर्ण रुपले कार्य गर्नुपर्ने बताए । बैंकका प्रमुख कार्यकारी अधिकृत किरणकुमार श्रेष्ठले बैंकले लामो समयदेखि उत्कृष्ठ कार्य गर्ने कर्मचारीलाई पुरस्कृत गर्ने गरेकाले कार्यसम्पादनमा यसको उपलब्धी देखिएको बताए । कार्यक्रममा बैंकका नायब प्रमुख कार्यकारी अधिकृतहरु देवेन्द्ररमण खनाल र सरस्वती अधिकारी, उपकार्यकारी अधिकृतहरु विमल डंगोल, पवन रेग्मी र दुर्गा कुमारी कँडेल, रा.वा. बैंक कर्मचारी संघ नेपालका बरिष्ठ उपाध्यक्ष बद्रिप्रसाद तिमिल्सिना, नेपाल वित्तीय संस्था कर्मचारी संघ, रा.वा. बैंकका अध्यक्ष इश्वरबहादुर सिंह, नेपाल राष्ट्रिय कर्मचारी संगठन, रावा बैंकका उपाध्यक्ष जितेन्द्र राई लगायत कर्मचारीहरुको उपस्थिति रहेको थियो । ब्रान्च अपरेशन विभागका विभागीय प्रमुख आनन्द सुवेदीले कार्यक्रम सञ्चालन गर्नुभएको थियो ।
बैंकको हाल ७ प्रदेश, ७७ जिल्लाका सबै सदरमुकाममा सहित २७१ वटा शाखा कार्यालय, ५२ वटा एक्सटेन्सन काउन्टर, २६९ वटा एटिएम र ९९ वटा शाखा रहित बैंकिङ, क्यूआर कोड सेवा, पस सेवा, क्रेडिट कार्ड, डेबिट कार्ड, कनेक्ट आइपीएस, स्मार्ट क्यूआर टेलर (बिना चेक रकम झिक्न सकिने), इन्टरनेट बैंकिङ, परिष्कृत रुपको मोवाईल बैंकिङ तथा बिना इन्टरनेट चल्ने मोवाइल बैंकिङका सेवाहरु समेत सञ्चालनमा रहेका छन ।
All financial information at your fingertips.
शेयर गर्नुहोस
सम्बन्धित समाचार
