सेयरबजारमा बढ्यो लगानीकर्ताको चहलपहल, नेप्से ६२ अंकले बढ्दा ९ अर्ब ७७ करोडको कारोबार
२०८१ कात्तिक २५, आइतबार ।
सेयर खबर । चाडपर्व सकिएसँगै खुलेको सेयरबजारमा लगानीकर्ताको चहलपहल बढेको छ । आज कारोबार मापक नेप्से परिसूचक ६२.५४ अंकले बढेर २७३८.०६ विन्दुमा पुगेको छ । कारोबार रकम पनि उच्च भएको छ । नौ अर्ब ७७ करोड ११ लाख २४ हजार रुपैयाँ बराबरको दुई करोड २४ लाख ७४ हजार २८१ कित्ता सेयर किनबेच भएको छ ।
कारोबार भएका २४४ कम्पनीमध्ये २२८ वटाको सेयरमूल्य बढ्दा बजार हरियो बनेको हो । तर १३ कम्पनीका सेयरधनीले आज गुमाएका छन् भने तीन कम्पनीको सेयरमूल्य स्थिर रहेको छ ।
हाइड्रोपावर समूहमा लगानीकर्ताको आकर्षण सबैभन्दा धेरै देखियो । यो समूह ४.२६ प्रतिशत बढेको छ । त्यसपछि होटल तथा पर्यटन, विकास बैंक, लगानी, अन्य, फाइनान्स, उत्पादन तथा प्रशोधन र जस्वन बीमा समूह दुई प्रतिशतभन्दा धेरै बढेका छन् । वाणिज्य बैंकहरुको बैंकिङ समूह १.६२ प्रतिशत बढेको छ । निर्जीवन बीमा १.९५ प्रतिशत र लघुवित्त १.५१ प्रतिशतले बढेको छ । ब्यापार समूह १.१५ प्रतिशत, होटल तथा पर्यटन ०.९६ प्रतिशत र म्युचुअल फण्ड ०.६२ प्रतिशत बढेको छ ।
कारोबार बन्द हुँदासम्म छ वटा कम्पनीको सेयरमूल्यमा सकारात्मक सर्किट ब्रेक लागेको छ । सानिमा जीआईसी इन्स्योरेन्सको सेयरकारोबार सबैभन्दा धेरै ३८ करोड रुपैयाँ बढीको भएको छ ।
लगानीकर्ताको सम्पत्ति एक दिनमै ९९ अर्ब रुपैयाँ बढेको छ । बजार पुँजीकरण ४३ खर्ब ५८ अर्ब रुपैयाँ पुगेको छ । साधारण सेयरतर्फको बजार पुँजीकरण ३४ अर्ब रुपैयाँ बढेर १५ खर्ब ३९ अर्ब रुपैयाँ कायम भएको छ ।
शेयर गर्नुहोस
रिपोर्ट तथा सूचना
