युवाहरुलाई अर्थतन्त्रबारे जानकारी गराउन सुरु भयो ‘आर्थिक साक्षरता अभियान’
बैंकको खबर । युवाहरूलाई समग्र अर्थतन्त्रको विषयमा जानकारी गराउने उद्देश्यअनुरुप आर्थिक साक्षरता अभियान सुरु भएको छ । आर्थिक क्षेत्रमा काम गर्दै आएको अक्ष ज्योति प्रालीले काठमाडौँको पब्लिक यूथ क्याम्पसबाट आर्थिक साक्षरता अभियान सुरु गरेको छ ।
अभियानको सुरुवात गर्दै पूर्वअर्थमन्त्री डा. प्रकाशशरण महतले देशभर आर्थिक साक्षरता अभियान लैजान आवश्यक भएको बताए ।
‘‘युवाहरूलाई समग्र अर्थतन्त्रको विषयमा जानकारी गराउन यस्तो अभियान देशभर लैजान जरुरी छ,’ पुर्वमन्त्री महतले भने, ‘कानुनले दिएका कयौँ सुविधाको विषयमा युवाहरूलाई जानकारी गराउन नसक्दा समस्या सिर्जना भएको छ । यस्तो कार्यक्रमले युवाहरूलाई सचेत बनाउन सहयोग गर्छ ।’ कार्यक्रमका प्रमुख अतिथि रहेका महतले विद्यार्थीले क्याम्पसमा पढ्दा देखी नै भविष्यमा के गर्ने भन्ने योजना बनाउनु पर्ने बताए ।
‘धेरै युवाहरूलाई विदेशमा मात्रै भविष्य छ भन्ने लाग्ने गरेको छ । त्यो सत्य होइन । मैले पनि अमेरिकाबाट अर्थशास्त्रमा पिएचडी गरेको थिएँ,’ महतले भने, ‘विदेश ३० सेकेन्डको टिकटक वा रिल बनाए जस्तो सजिलो छैन, नेपालमा कयौँ काम हुन बाँकी रहेकाले यहाँ ठुलो अवसर छ ।’
पब्लिक यूथ क्याम्पसको स्वतन्त्र विद्यार्थी युनियनसँगको सहकार्यमा आयोजित आर्थिक साक्षरता अभियानलाई राष्ट्रिय वाणिज्य बैङ्कले सहयोग गरेको छ । अभियान अन्तर्गत ‘मौद्रिक नीतिले देशको आर्थिक विकासमा पार्ने प्रभाव’का विषयमा निबन्ध लेखन प्रतिस्पर्धा आयोजना गरिएको थियो ।
निर्णायक मण्डलले छनौट गरेको उत्कृष्ट ३ निबन्धलाई ट्रर्फी, सर्टिफिकेट र नगद पुरस्कार सहित सम्मान गरिएको थियो । कार्यक्रमका प्रमुख अतिथि डा. महतले निबन्ध प्रतियोगितामा प्रथम भएका सुमन समल मगरलाई ट्रर्फी, सर्टिफिकेट सहित ९ हजार रुपैयाँ नगद पुरस्कार प्रदान गरेका थिए ।
यस्तै, दोस्रो भएका शिशिर लामिछानेलाई ट्रर्फी, सर्टिफिकेट सहित ५ हजार रुपैयाँ नगद पुरस्कार प्रदान गरिएको थियो । तेस्रो भएकी सुरक्षा कडेललाई ट्रर्फी, सर्टिफिकेट सहित ३ हजार रुपैयाँ नगद पुरस्कार प्रदान गरिएको थियो ।
अक्ष ज्योतिले आगामी दिनमा देशभरका विभिन्न क्याम्पसमा विद्यार्थी क्लबसँगको सहकार्यमा निबन्ध प्रतियोगिताका साथै वक्तृत्वकला प्रतिस्पर्धा, उद्यमशीलता सम्बन्धी तालिम, प्रस्ताव लेखन कार्यशाला र लेक्चर सिरिजलाई निरन्तरता दिने जनाएको छ ।
क्याम्पसमा २ वटा प्रशिक्षण कार्यक्रम समेत आयोजना गरिएको थियो । ‘स्टार्टअप र साना उद्यमीहरूको समस्या, वित्तीय पहुँचको लागी बैंकहरूसँग कसरी सम्पर्क गर्ने भन्ने विषयमा राष्ट्रिय वाणिज्य बैंकका सञ्चालक समिति सदस्य अनलराज भट्टराईले प्रशिक्षण दिएका थिए ।
यस्तै, कार्यक्रममा आयोजित ‘डिजिटल बैंकिङको वरदान र आशीर्वाद, नियामकको तयारी र दृष्टिकोण’ विषयमा नेपाल राष्ट्र बैंकका कार्यकारी निर्देशक गुणाकर भट्ट र नेपाल क्लियरिङ हाउस लिमिटेडका प्रमुख कार्यकारी अधिकृत निलेशमान सिंह प्रधान प्रशिक्षण प्रदान गरेका थिए ।
All financial information at you fingertips.
शेयर गर्नुहोस
रिपोर्ट तथा सूचना
