बैंकिङ प्रणालीमा पैसा थुप्रिदै गएपछि राष्ट्र बैंकले एकै दिन एक खर्ब तान्दै
बैंकको खबर । नेपाल राष्ट्र बैंकले आज (२०८१ कात्तिक २१ गते) बैंकिङ प्रणालीमा रहेको एक खर्ब रुपैयाँ तान्न लागेको हो । राष्ट्र बैंकले यो पैसा निक्षेप संकलन बोलकबोलमार्फत २१ दिनका लागि तान्न लागेको हो ।
वित्तीय प्रणालीमा अधिक तरलता रहेको खण्डमा केन्द्रीय बैंकले निक्षेप संकलन बोलकबोलमार्फत रकम तान्दै आएको छ । अहिले बैंकिङ प्रणालीमा करिब सात खर्ब रुपैयाँ लगानीयोग्य रकम छ । बजारमा कर्जाको माग न्यून भएपछि बैंकहरुको ऋण प्रवाह सुस्त छ । यहीकारण प्रणालीमा पैसा थुप्रिदै गएको छ ।
राष्ट्र बैंकले आज मध्यान्ह २ बजेसम्म अनलाइन मार्फत बोलकबोल हुने जनाएको छ । आजै निष्काशन हुने निक्षेप संकलनको ब्याजदर बोलकबोलको माध्यमबाट निर्धारण हुनेछ । यसको साँवा तथा ब्याज भुक्तानी मंसिर १२ गते हुने राष्ट्र बैंकले जनाएको छ ।
केन्द्रीय बैंकमा पैसा राख्न चाहने बैंक तथा वित्तीय संस्थाले घटीमा १० करोड रुपैयाँ र बढीमा पाँच करोडले भाग गर्दा निःशेष भाग जाने गरी कुल आव्हान रकमसम्म आवेदन दिन सक्नेछन् । निक्षेप संकलनको बोलकबोल ब्याजदरमा गर्नुपर्नेछ ।
All banking infomation at your fingertips.
