वाणिज्य बैंकहरुको प्राथमिकतामा नगद लाभांश
बैंक खबर । अहिलेसम्म १० वाणिज्य बैंकहरुले गत आर्थिक वर्ष २०७९/८०को नाफाबाट लाभांश वितरण घोषणा गरेका छन् । यसमध्ये केहीले साधारणसभा सम्पन्न गरी लाभांश वितरण गरिसकेका छन् ।
अहिलेसम्म माछापुच्छ्रे बैंक, एभरेष्ट बैंक, नेपाल एसबीआई बैंक, सिटिजन्स बैंक, सिद्धार्थ बैंक, एनआईसी एशिया, स्ट्याण्डर्ड चार्टर्ड, सानिमा बैंक, ग्लोबल आइएमई र नबिल बैंकले लाभांश घोषणा गरेका हुन् ।
लाभांश घोषणा गरेका १० मध्ये ६ ओटा वाणिज्य बैंकले साधारणसभा सम्पन्न गरी प्रस्तावित लाभांश पारित गरेका छन् । माछापुच्छ्रे बैंक, एभरेष्ट बैंक, एनआईसी एशिया, सानिमा, सिटिजन्स र सिद्धार्थ बैंकले साधारणसभा सम्पन्न गरिसकेका छन् । यी कम्पनीले सेयरधनीको खातामा लाभांश पठाइसकेका छन् ।
लाभांश घोषणा गरेकामध्ये केही बैंकले बोनस सेयरभन्दा नगद लाभांशमा जोड दिएका छन् । नबिल बैंकले गतवर्ष १८.५ प्रतिशत बोनस सेयर र ११.५ प्रतिशत नगद लाभांश वितरण गरेकोमा यस वर्ष ११ प्रतिशत नगद लाभांश मात्रै दिने प्रस्ताव गरेको छ । सिद्धार्थ बैंकले ४.२१, सिटिजन्स बैंक इन्टरनेशनलले ५.७९ र स्ट्याण्डर्ड चार्टर्ड बैंकले १९ प्रतिशत नगद लाभांश दिएका छन् । त्यस्तै ग्लोबल आइएमई बैंकले १ प्रतिशत बोनस सेयर र ८ प्रतिशत नगद लाभांश वितरण गर्दै छ । नेपाल एसबीआई बैंकले ६.८० प्रतिशत नगद लाभांश र ३.७५ प्रतिशत बोनस सेयर वितरण गर्ने घोषणा गरेको छ ।
बोनस सेयर वितरण गर्दा कम्पनीको चुक्ता पूँजी बढाउने, नेटवर्थ तथा सञ्चिति घटाउने र सेयरधनीको कित्तामा परिमाणात्मक वृद्धि दिनेबाहेक गुणात्मक रूपमा फाइदा नहुने भएपछि बैंकहरुले नगद लाभांशमा जोड दिएको देखिन्छ । नेपाली बजारमा बोनस सेयरलाई बढी प्राथमिकता दिइने भएकाले बैंकहरुले नगद लाभांशमा जोड दिँदा दोस्रो बजार प्रभावित हुनसक्ने विश्लेषकहरु बताउँछन् । तर लगानीकर्ताको हित र कम्पनीको दीर्घकालिन उन्नतिको लागि नगद लाभांश राम्रो मानिन्छ । कम्पनीले नगद लाभांशमा जोड दिँदा नेटवर्थ राम्रो हुन सक्छ ।
कम्पनीको चुक्ता पुँजी भन्दा जगेडा कोष बलियो हुँदा कम्पनीलाई दीर्घकालिन उन्नतीका लागि सहज हुन्छ । तर नेपालमा सेयर लगानीकर्ताले बोनस सेयर रुचाउने र कम्पनीले पनि बोनस सेयर वितरण गरी सेयरधनी खुशि पार्ने परिपाटी छ । यसपटक त्यो अवस्था रहेन । नेपालमा नियामक निकायहरुले पनि चुक्ता पुँजी बढाउन निर्देशन दिने परिपाटीले पनि बोनस सेयरलाई राम्रो मानिदै आएको छ ।
| बैंकको नाम | बोनस सेयर | नगद लाभांश | कुल लाभांश |
| माछापुच्छ्रे बैंक | १३.३ प्रतिशत | ०.७० प्रतिशत | १४ प्रतिशत |
| एभरेष्ट बैंक | १० प्रतिशत | १०.५३ प्रतिशत | २०.५३ प्रतिशत |
| नेपाल एसबीआई बैंक | ३.७५ प्रतिशत | ६.८० प्रतिशत | १०.५५ प्रतिशत |
| सिटिजन्स बैंक इन्टरनेशनल | - | ५.७९ प्रतिशत | ५.७९ प्रतिशत |
| सिद्धार्थ बैंक | - | ४.२१ प्रतिशत | ४.२१ प्रतिशत |
| एनआईसी एशिया | २९ प्रतिशत | १.५३ प्रतिशत | ३०.५३ प्रतिशत |
| स्ट्याण्डर्ड चार्टर्ड | - | १९ प्रतिशत | १९ प्रतिशत |
| सानिमा बैंक | ९ प्रतिशत | ५.७० प्रतिशत | १४.७० प्रतिशत |
| ग्लोबल आइएमई | १ प्रतिशत | ८ प्रतिशत | ९ प्रतिशत |
| नबिल बैंक | - | ११ प्रतिशत | ११ प्रतिशत |
All financial information at your fingertips.
शेयर गर्नुहोस
रिपोर्ट तथा सूचना
