चीनमा विश्वको सबैभन्दा ठूलो सुन भण्डार भेटियो
२०८१ मंसिर १६ गते आइतबार ।
अन्तर्राष्ट्रिय । चीनको हुनान प्रान्तमा विश्वको सबैभन्दा ठूलो सुन भण्डार फेला परेको छ । चिनियाँ समाचार माध्यमहरुका अनुसार हुनानको पिङ्जियाङ काउन्टीमा एक हजार मेट्रिक टन उच्च गुणस्तरको सुन फेला परेको हो। जसको मूल्य ८३ अर्ब डलर (७ लाख करोड रुपैयाँ) भन्दा बढी अनुमान गरिएको छ।
सुन समन्धी विज्ञ चेन रुलिनले धेरै ड्रिल गरिएको चट्टानको कोरमा सुन स्पष्ट रूपमा देखिएको बताएका छन्। कोर नमूनाहरूले देखाउँदछ कि १ मेट्रिक टन अयस्कमा १३८ ग्राम (लगभग ५ औंस) सुन हुन सक्छ।
यसलाई विश्वमा अहिलेसम्म भेटिएको सबैभन्दा ठूलो सुनको भण्डार मानिएको छ । यो दक्षिण अफ्रिकाको साउथ डीप खानीमा रहेको ९०० मेट्रिक टनभन्दा बढी हो।
रिपोर्टका अनुसार पिङजियाङ काउन्टीमा ४० भन्दा बढी सुनका खानी फेला परेका छन्। यसअघि यहाँ ३ सय मेट्रिक टन सुन रहेको भौगर्भिकहरूले अनुमान गरेका थिए । तर, पछि थ्रीडी मोडलिङ प्रयोग गर्दा सुनको दरारको गहिराई ३ हजार मिटरसम्म रहेको पत्ता लागेको थियो । यसमा अनुमानभन्दा ७ सय मेट्रिक टन बढी सुन रहेको छ ।
चिनियाँ अधिकारीहरूले त्यहाँ थप अनुसन्धान गरिरहेका छन्। यसको खोजी गर्ने हुनान गोल्ड कर्पोरेशनका अनुसार धेरै गहिराइका कारण खानीमा कति सुन छ भन्ने थाहा हुन सकेको छैन । जसका कारण मूल्य कति हुन्छ अहिले नै भन्न सकिने अवस्था भने छैन ।
विश्वको सुन उत्पादनको १० प्रतिशत चीनमा हुन्छ
चीन संसारको सबैभन्दा ठूलो सुन उत्पादक हो। सन् २०२३ मा विश्वव्यापी उत्पादनमा चीनको हिस्सा लगभग १० प्रतिशत थियो। विश्व गोल्ड काउन्सिलको प्रतिवेदनअनुसार चीनसँग २ हजार २६४ टन सुन भण्डार छ ।
यदि कुनै देशको मुद्रा अन्तर्राष्ट्रिय रूपमा कमजोर हुन्छ भने सुनको भण्डारले त्यस देशको क्रयशक्ति र आर्थिक स्थिरता कायम राख्न मद्दत गर्दछ। सन् १९९१ मा जब भारतको अर्थतन्त्र डुबिरहेको थियो र सामान आयात गर्न डलर अभाव भएको थियो । त्यसबोला भारतले सुन धितो राखेर डलर लियो र आर्थिक संकटबाट बाहिर निष्किएको थियो ।
त्यसैले सुन धेरै सञ्चिति हुनु भनेको देशको अर्थतन्त्र बलियो हुनु हो । यसले पनि देखाउँछ कि देशले आफ्नो पैसा राम्रोसँग व्यवस्थापन गर्छ। यस्तो अवस्थामा अन्य देश र विश्व वित्तीय संस्थाहरूले त्यो देशलाई बढी विश्वास गर्छन्। सुनको भण्डारले कुनै पनि देशको मुद्रा मूल्यलाई समर्थन गर्न ठोस सम्पत्ति प्रदान गरेको हुन्छ ।
शेयर गर्नुहोस
रिपोर्ट तथा सूचना
